पनौती, काभ्रे । काभ्रेपलाञ्चोक जिल्लाको पनौती नगरपालिका वडा नं. ५ स्थित सुब्बागाउँ कृषि सहकारी संस्था लिमिटेड र कृषि विकास कार्यालयको संयुक्त आयोजनामा “व्यवसायिक तरकारी खेती कार्यक्रम” अन्तर्गत यान्त्रीकरण हस्तान्तरण तथा सार्वजनिक सुनुवाइ कार्यक्रम भव्यरूपमा सम्पन्न भएको छ।
ढलमलेस्थित सहकारीको कार्यालय प्राङ्गणमा आयोजित कार्यक्रममा प्रमुख अतिथिका रूपमा पनौती नगरपालिका वडा नं. ५ का वडा अध्यक्ष विनोद खत्रीको उपस्थिति रहेको थियो। कार्यक्रममा विशिष्ट अतिथि कृषि विकास कार्यालय काभ्रेका कार्यालय प्रमुख कुलप्रसाद दवाडी रहनुभएको थियो। यस्तै, पनौती नगरपालिका कृषि शाखाका प्रतिनिधिहरु, सहकारीका पूर्वअध्यक्ष, वर्तमान कार्यसमिति सदस्यहरू, स्थानीय कृषकहरू तथा सञ्चारकर्मीहरूको समेत उल्लेख्य उपस्थिति रहेको थियो।
कार्यक्रमको उद्देश्य र पृष्ठभूमि
कृषि उत्पादनमा आधुनिकीकरण र मेशिनहरूको प्रयोगबाट कृषकहरूको श्रम बचत गर्नुका साथै उत्पादनको गुणस्तर तथा परिमाण वृद्धिलाई प्रोत्साहन गर्ने उद्देश्यले कृषि विकास कार्यालयको सहकार्यमा सो कार्यक्रम आयोजना गरिएको हो।
कार्यक्रमको सुरुवात सहकारी अध्यक्षको स्वागत मन्तव्यबाट गरिएको थियो। उहाँले सहकारीले स्थानीय कृषकको समुन्नतिमा खेलेको भूमिकाबारे जानकारी दिँदै आगामी दिनमा समेत यस्ता कार्यक्रमलाई निरन्तरता दिने प्रतिबद्धता व्यक्त गर्नुभयाे ।
प्रमुख अतिथि र विशिष्ट अतिथिका मन्तव्य
कार्यक्रमका प्रमुख अतिथि वडा अध्यक्ष विनोद खत्रीले सम्बोधन गर्दै कृषि यान्त्रीकरणबाट कृषकको जीवनस्तरमा ठूलो परिवर्तन आउने विश्वास व्यक्त गर्नुभयो। “आजको समयमा परम्परागत कृषि प्रणालीले मात्र हामीलाई आत्मनिर्भर बनाउँदैन, त्यसैले आधुनिक उपकरणको प्रयोग अनिवार्य छ,” उहाँले भन्नुभयो । साथै, उहाँले सहकारीले किसानहरूलाई मार्गदर्शन र आवश्यक स्रोत-साधन उपलब्ध गराउँदै आएकोप्रति सराहना प्रकट गर्नुभयो।
विशिष्ट अतिथि कुलप्रसाद दवाडीले कृषि यान्त्रीकरण कार्यक्रम सरकारको प्राथमिकतामा रहेको उल्लेख गर्दै उपकरणहरूको सही सदुपयोग र संरक्षणमा सबैले ध्यान दिनुपर्नेमा जोड दिनुभयो। “उपकरण मात्रैले पुग्दैन, त्यसको दक्ष प्रयोग र अनुगमन पनि अत्यावश्यक छ,” उहाँले भन्नुभयो। उहाँले सहकारीसँगको सहकार्य भविष्यमा पनि निरन्तर रहने आश्वासन दिनुभयो।
सार्वजनिक सुनुवाइ: जवाफदेही र पारदर्शिताको अभ्यास
कार्यक्रमको दोस्रो चरणमा सार्वजनिक सुनुवाइ सत्र सञ्चालन गरिएको थियो । जहाँ किसानहरूले आफ्ना सुझाव, गुनासा तथा आवश्यकताहरू राख्न पाएका थिए। सहकारीका प्रतिनिधिले सो प्रश्नहरूको जवाफ दिँदै भावी योजनाबारे समेत जानकारी गराएका थिए।
सहभागीहरूको उत्साहजनक उपस्थिती
स्थानीय कृषकहरूको उल्लेखनीय उपस्थिती रहेको कार्यक्रममा सहभागीहरूले आधुनिक कृषि प्रविधिप्रतिको चासो र उत्साह व्यक्त गरेका थिए। धेरै किसानहरूले यस्तो किसिमको सहकार्यात्मक कार्यक्रमले आफूहरूलाई आत्मनिर्भर कृषक बन्ने प्रेरणा मिलेको बताएका थिए। कार्यक्रमको अन्त्यमा अध्यक्षले धन्यवाद ज्ञापन गर्दै सबै अतिथि, सहभागी र सहकार्य संस्थाप्रति आभार व्यक्त गर्नुभएको थियो।