सिन्धुपाल्चोक । नेपाली कांग्रेस सिन्धुपाल्चोकमा उत्साहजनकरुपमा क्रियाशील सदस्यता नवीकरण गरिएको छ ।
नेपाली कांग्रेस केन्द्रीय कार्यालयको नाममा रहेको खाता नम्बर १७००१००००७१४६०१० (राष्ट्रिय वाणिज्य बैंक, शाखा कार्यालय टेकु) मा सिन्धुपाल्चोक जिल्लाबाट ११ हजार ८ सय ३१ जना क्रियाशील सदस्यको नवीकरणमार्फत संकलित १७ लाख ७४ हजार ८ सय ३० रुपैयाँ रकम जम्मा गरी बिहीबार केन्द्रीय कार्यालयमा बैंक भौचर बुझाइएको छ ।
कांग्रेस सिन्धुपाल्चोकका सभापति तथा युवा एवं जुझारु नेता जंगबहादुर तामाङको नेतृत्वमा केन्द्रीय कार्यालय पुगेर उक्त भौचर औपचारिकरूपमा बुझाइएको हो । पार्टी संगठन सुदृढीकरणका लागि जिल्लाबाट उल्लेखनीय संख्यामा सदस्य नवीकरण हुनु सकारात्मक उपलब्धि भएको नेताहरूले बताएका छन् । नवीकरण अभियानमा पार्टीका नेता, कार्यकर्ता तथा शुभेच्छुकहरूको सक्रिय सहभागिता रहेको जनाइएको छ ।
यस सम्बन्धमा जानकारी दिँदै नेपाली कांग्रेसका जिल्ला प्रवक्ता नवराज भट्टराईले सिन्धुपाल्चोक कांग्रेस संगठनलाई अझ मजबुत बनाउने लक्ष्यसहित अभियानलाई निरन्तरता दिइने बताउनुभयो ।