काठमाडौं । चालु आर्थिक वर्षको कात्तिक महिनामा मादक पद्धार्थ सेवन गरि सवारी साधन चलाउने चालकहरुबाट २५० वटा दुर्घटना भएका छन् ।
नेपाल प्रहरीले दिएको जानकारी अनुसार त्यस्ता दुर्घटनाबाट ११ जनाको मृत्यु र ३७५ जना घाइते भएका छन् । तथ्यांक अनुसार काठमाडौं उपत्यकाका तीन जिल्लामा ५७ वटा दुर्घटना भए । जसमा एक जनाको मृत्यु र ७४ जना घाइते भएका थिए ।
वागमती प्रदेशको काठमाडौं उपत्यकाबाहेकका १० जिल्लामा १२ वटा दुर्घटनामा एक जनाको मृत्यु र २२ जना घाइते भएको तथ्यांक छ । मापसेका कारण लुम्बिनी प्रदेशमा सबैभन्दा धेरै दुर्घटना भए । यहाँ १०३ दुर्घटनामा ७ जनाको मृत्यु र १६३ जना घाइते भएका थिए ।
यस्तै कात्तिकमा मापसे गरि सवारी संचालन गर्दा कोशी प्रदेशमा ४१ वटा दुर्घटना, एक जनाको मृत्यु र ६१ जना घाइते भएका थिए । मधेस प्रदेशमा २० वटा दुर्घटना, एक जनाको मृत्यु र २८ जना घाइते, गण्डकीमा भएका चार वटा दुर्घटनामा ६ जना घाइते भए । यहाँ मृत्यु हुनेको संख्या शुन्य छ ।
कर्णालीमा ६ वटा दुर्घटनामा १० जना घाइते र सुदुरपश्चिम प्रदेशमा ७ वटा दुर्घटनामा ११ जना घाइते भएका र यी दुवै प्रदेशमा मृत्यु हुनेको संख्या शुन्य रहेको नेपाल प्रहरीले जनाएको छ ।