तेमाल । गत भदाै १० गते रसुवाकाे भोटेकोशी नदीमा आएको विनाशकारी बाढीबाट प्रभावित विभिन्न जिल्लाका नागरिकको सहयोगका लागि काभ्रेको तेमाल गाउँपालिकाले २५ लाख ३३ हजार ३ सय ३३ रुपैयाँ सहयोग गर्ने भएको छ । तेमाल गाउँपालिकाले बाढीबाट रसुवा, नुवाकोट र धादिङ जिल्लाका विभिन्न स्थानमा भएको जनधनको क्षतिप्रति दुःख व्यक्त गर्दै प्रधानमन्त्री दैवी प्रकोप उद्धार कोषमा आर्थिक सहयोग गर्ने निर्णय गरेको हो ।
गाउँपालिकाका अध्यक्ष चन्द्रबहादुर तामाङद्वारा हस्ताक्षरित पत्रमा भोटेकोशी नदीमा आएको विनाशकारी बाढीका कारण भएको जनधनको क्षतिप्रति तेमाल गाउँपालिकाले गहिरो दुःख व्यक्त गरेको उल्लेख छ । प्राकृतिक विपत्तिमा परी ज्यान गुमाएका सम्पूर्ण नागरिकप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति समवेदना तथा घाइतेहरूको शीघ्र स्वास्थ्यलाभको कामना पनि गरिएको छ ।
गाउँपालिकाले विपद्को यस घडीमा जनप्रतिनिधिहरूले पाउने १० दिन बराबरको सेवा सुविधा बापतको रकम तथा गाउँपालिकाका सम्पूर्ण कर्मचारी र शिक्षकहरूको पारिश्रमिकबाट कट्टा गरिएको रकमसमेत जोडेर उक्त सहयोग रकम जम्मा गरेको जनाएको छ ।