काभ्रे । जिल्ला सहकारी संघ लि., काभ्रेको ५९औँ स्थापना दिवसको अवसरमा शुभकामना आदान–प्रदान कार्यक्रम सम्पन्न भएको छ ।
संघका अध्यक्ष अमन पोटे श्रेष्ठको अध्यक्षतामा भाद्र २६ गते शुक्रबार संघको सभाहलमा आयोजित कार्यक्रममा सहकारी क्षेत्रसँग सम्बन्धित विभिन्न महानुभावहरूको गरिमामय उपस्थिति रहेको थियो ।
कार्यक्रममा संघको स्थापना, सहकारी क्षेत्रको विकासमा संघले निर्वाह गर्दै आएको भूमिका तथा आगामी दिनमा संघलाई थप सुदृढ र प्रभावकारी बनाउँदै लैजाने विषयमा चर्चा गरिएको थियो । सहभागीहरूले सहकारी अभियानको संस्थागत विकास, समसामयिक चुनौतीको समाधान तथा सहकारी संस्थाबीचको सहकार्यलाई थप प्रभावकारी बनाउनुपर्नेमा जोड दिएका थिए ।
५९औँ स्थापना दिवसका अवसरमा संघले विभिन्न सामाजिक तथा सेवामूलक कार्यक्रमसमेत आयोजना गरेको जनाएको छ । संघले स्थापना दिवसलाई केवल औपचारिक कार्यक्रमका रूपमा सीमित नराखी सामाजिक उत्तरदायित्वसँग जोड्दै विविध गतिविधि सञ्चालन गरेको हो ।