बनेपा । हलिं नेवाः गुथिले आगामी पौष १३ गते नवमी तिथीका दिन १६ औं नेवाः एकता दिवस मनाउने भएको छ ।
ने.सं.११४६ पहेंलाथ्व नमीः का दिन यो दिवस मनाइने गरिन्छ । यसका लागि तयारी अन्तिम चरणमा पुगेको हलिं नेवाः गुथि, नेवाः एकता दिवस मुल समारोह समितिका अध्यक्ष जगन्नाथ श्रेष्ठले जानकारी दिनुभयो । जिल्लाका तत्कालिन सात गाउँ बनेपा, नाला, साँगा, धुलिखेल, खड्पु, चौकोट र पनौतीका नेवार संस्कृति र सम्पदाको जगेर्ना गर्ने उद्देश्यले दिवस मनाउन लागिएको उहाँले बताउनुभयो ।
यस अवसरमा जिल्लामा हलिं नेवाः एकता धिमे बाजासहितको र्याली र नेवारी भोज कार्यक्रमको आयोजना गरिनेछ । विगत ४ वर्षदेखि जिल्लामा यस्ता कार्यक्रमहरु आयोजना हुँदै आएको आयोजकले जनाएको छ ।