धुलिखेल । जिल्ला प्रशासन कार्यालय काभ्रेपलाञ्चोकबाट नयाँ नागरिकता लिनेभन्दा प्रतिलिपी बनाउनेको संख्या यस वर्ष पनि बढी देखिएको छ । गत वर्ष पनि यो संख्या उच्च नै थियो ।
कार्यालयले सार्वजनिक गरेको तथ्यांकअनुसार चालु आर्थिक वर्षको साउनदेखि असोजसम्म १ हजार ८४४ नयाँ नागरिकता जारी गरिएको छ । जसमा साउन महिनामा ८४४ नागरिकता जारी भएका छन् । भदौमा ५३८ र असोजमा ४६२ नागरिकता जारी भएको छ । यही अवधिमा नागरिकताको प्रतिलिपी लिनेको संख्या २ हजार ७६० छ । साउनमा १ हजार १७४, भदौमा १ हजार ४२ र असोजमा ५४४ वटा नागरिकताका प्रतिलिपी जारी भएका छन् ।
पुरानो हस्तलिखित नागरिकता खुइलिने र बिग्रने गरेका र सरकारले राष्ट्रिय परिचयपत्र अनिवार्य गरेपछि यसका लागि आउनेहरु बढ्दै गएका कारण कतिपय पुरानो नागरिकतामा त्रुटीहरु फेला परेका छन् । जसले गर्दा पछिल्ला केही महिनायता नागरिकताको प्रतिलिपी लिनेहरु बढेको जिल्ला प्रशासन कार्यालय काभ्रेका प्रशासकीय अधिकृत कृष्ण सापकोटाले बताउनुभयो । उहाँका अनुसार पहिले गाउँमा टोली गएर बनाएका नागरिकतामा कतै उमेर, कतै थर र कतै नामै गल्तीहरु पाइएका छन् । यी गल्तीहरु सुधार गर्नुपर्दा प्रतिलिपी लिनेहरुको संख्या बढेको हो ।
गत साउनदेखि असोजसम्मको अवधिमा नागरिकता परित्याग गर्नेको संख्या ९ रहेको छ भने सोही अवधिमा गैरआवासीय नागरिकता चार वटा जारी भएको छ । चार वटा नागरिकता रद्द र दुई एउटा अंगिकृत नागरिकता जारी गरिएको कार्यालयको तथ्यांकमा उल्लेख छ ।
चालु आर्थिक वर्षको असोजसम्ममा राष्ट्रिय परिचयपत्रका लागि आवेदन दिनेको संख्या ८ हजार ३१२ रहेको छ । साउन महिनामा मात्र यो संख्या ३ हजार ४५३ रहेको छ । भदौमा २ हजार ८९७ र असोजमा १ हजार ९६२ जनाले आवेदन दिएका छन् । यही अवधिमा २ हजार ६३ वटा कार्ड वितरण भएका छन् । दलित र जनजाती परिचयपत्र १८३ वटा जारी भएका छन् ।
यस्तै ३ हजार ७४४ वटा राहदानीको आवेदन दर्ता भएको प्रशासनमा ३ हजार ३३५ कार्ड वितरण भएको छ । तीन महिनामा नाबालक परिचयपत्र १७१ वटा जारी भएको प्रशासन कार्यालयले जनाएको छ । यसैगरि ३३ वटा मुद्दा दर्ता भएका छन् भने १२ वटा फस्र्याैट भएका छन् । यस्तै ठाडो उजुरी ४१ वटा दर्ता हुँदा ४१ वटा नै फस्र्याैट भएका छन् । कार्यालयमा यसवर्ष २ वटा नयाँ संघसंस्था दर्ता भएका छन्, ५० वटा नवीकरण भएका छन् भने ५ वटा हातहतियार नवीकरण भएका छन् ।
यसैगरि कार्यालयबाट कारागार निरिक्षण दुई पटक, सरकारी कार्यालय अनुगमन २० पटक, प्रहरीलगायत सुरक्षा निकायको अनुगमन ५ पटक, विकास आयोजना अनुगमन ३ पटक र संघसंस्था अनुगमन १२ पटक गरिएको कार्यालयले सार्वजनिक गरेको तथ्यांकमा उल्लेख छ ।
यसबीचमा जिल्ला सुरक्षा समितिको बैठक २२ पटक बसेको छ भने जिल्ला विपद् व्यवस्थापनसँग सम्बन्धित बैठक २ पटक बसेको छ । कार्यालयले शहीद परिवार, द्वन्द्व पीडित परिवार र वैदेशिक रोजगार पीडित परिवारलाई ६१ लाख ३३ हजार ६१९ रुपैयाँ राहत वितरण गरेको छ । विपदमा परेकाहरुका लागि अहिलेसम्म कुनै पनि राहत वितरण गरिएको छैन ।
यो समय अवधिमा कार्यालयले कूल १ करोड ९६ लाख ६७ हजार ९३९ रुपैंयाँ राजश्व संकलन गरेको छ । चालु खर्च ८३ लाख ९३ हजार ६२१, पूँजीगत ५ लाख ९९ हजार २६५ र विविध खर्च ३ करोड २८ लाख ८३ हजार ६१९ रुपैयाँ भएको छ । धरौटी विवरणबाट आम्दानी ३ करोड १६ लाख २६ हजार ३९७ प्राप्त भएको छ । विशिष्ठ व्यक्तिको भ्रमण ८५ पटक भएको छ ।
यसैगरि जिल्लाभर २१६ वटा आपराधिक घटना भएका छन् । यस्ता घटनामा संलग्न १८६ जना पक्राउ परेका छन् । जसमा ३ जनाको हत्या हुँदा २१ वटा आत्महत्याका घटना भएका छन् भने प्राकृतिक प्रकोपका घटना ८ वटा भएका छन् । जसमा ४ जनाको मृत्यु भएको र ५ जना घाइते भएको कार्यालयले उल्लेख गरेको छ । सवारी दुर्घटनामा ३ जनाको मृत्यु र ५९ जना घाइते भएका छन् ।
यसैगरि १२८ वटा पसल र फर्मको अनुमगन भएको र ४ वटालाई जरिवाना र कारबाही गरिएको छ । जरिवानाबापत ३५ हजार संकलन भएको छ । ३२ वटा फर्म र पसलबाट सामान जफत गरिएको र जसको मूल्य ८९ हजार २५ रहेको पनि कार्यालयले जनाएको छ । यस अवधिमा कार्यालयले ५ वटा ड्रोन उडान अनुमति दिएको छ । जिल्ला प्रशासन कार्यालयले सेवा प्रवाहलाई थप व्यवस्थित गर्न गत जेठ २७ गतेबाट डिजिटल टोकन प्रणाली शुरु गरेको छ ।
सेवा प्रवाहलाई छिटो र सहज बनाउन प्रयास हुनेछ ः प्रमुख जिल्ला अधिकारी
यसैबीच जिल्लामा भर्खरै आउनु भएका प्रमुख जिल्ला अधिकारी गोपालकुमार अधिकारीले कार्यालयबाट हुने सेवा प्रवाहलाई छिटो र सहज बनाउन प्रयास गरिने बताउनुभएको छ । आइतबार जिल्लाका पत्रकार तथा संचारकर्मीहरुसँग परिचयात्मक र समसामयिक विषयमा छलफल कार्यक्रममा उहाँले शान्ति सुरक्षा र सेवा प्रवाहलाई प्राथमिकतामा राखेर काम गरिने बताउनु भएको हो । कार्यक्रममा पत्रकारहरुले जिल्लामा भएका र हुन सक्ने विविध विषयहरुको उठान गर्दै प्रमुख जिल्ला अधिकारीको ध्यानाकर्षण गराएका थिए । कार्यक्रममा उठेका गुनासो र अन्य विषयहरुलाई सम्बन्धित सरोकारवालाहरुसँग छलफल र समन्वय गर्दै सम्बोधन गरिने उहाँले प्रतिबद्धता व्यक्त गर्नुभयो ।
