धुलिखेल । तथ्याङ्क समन्वय कार्यालय काभ्रेले तथ्याङ्क दिवस २०८२ को अवसरमा बिहीबार जिल्लाका सञ्चारकर्मीहरूसँग अन्तर्क्रिया कार्यक्रमकाे आयोजना गरेको छ।
नेपाल पत्रकार महासंघ काभ्रे शाखाका अध्यक्ष बिनोदकुमार न्यौपानेको प्रमुख आतिथ्यतामा कार्यक्रम भएकाे हाे । कार्यालयका तथ्याङ्क समन्वय अधिकारी दिपक कोइरालाको अध्यक्षतामा कार्यक्रम सम्पन्न भएकाे थियाे । आधिकारिक तथ्याङ्क, पारदर्शी शासन भन्ने नारासहित तथ्याङ्क दिवस मनाइएको हाे।
कार्यक्रममा तथ्याङ्क समन्वय अधिकारी कोइरालाले कार्यपत्र प्रस्तुत गर्नुभएकाे थियाे । उहाँले आफूहरुले तथ्यांकहरुकाे संकलन गर्ने काम गरिरहेकाे भए पनि त्यसलाई नागरिकसामु प्रवाह गर्ने काम पत्रकारहरुले गरिरहेकाे बताउँदै तथ्यांकमा अवधारणा र विधि हुने प्रष्ट पार्नुभयाे । उहाँले कुनै पनि तथ्यांक संकलन गर्दा तथ्यांककाे गुणस्तरमा ध्यान दिनुपर्नेमा जाेड दिनुभयाे । आगामी चैत १ गतेदेखि राष्ट्रिय गणना हुने उहाँले जानकारी दिनुभयाे ।
विसं २०१५ साल पुस १७ गते पहिलाे पटक तथ्यांक संकलन भएकाे मितिलाई आधार बनाएर हरेक वर्ष पुस १७ गतेलाई तथ्यांक दिवसकाे रुपमा मनाउने गरिन्छ । यसैक्रममा आज तथ्यांक समन्वय कार्यालय काभ्रेले पनि अन्तर्क्रिया कार्यक्रमकाे आयाेजना गरेकाे हाे ।
कार्यक्रमलाई सम्बाेधन गर्दै प्रमुख अतिथि नेपाल पत्रकार महासंघ काभ्रेका अध्यक्ष बिनाेदकुमार न्याैपानेले सही तथ्यांक संकलन गर्ने काममा कार्यालयले कुनै कन्जुस्याईं नगराेस् भन्दै शुभकामना दिनुभयाे । उहाँले यसका लागि संचारमाध्यमका तर्फबाट गर्नु पर्ने सहयाेगका लागि आफूहरु सधैं तयार रहेकाे बताउनुभयाे । उहाँले पत्रकार र तथ्याङ्क कार्यालयबीचको सहकार्य अझ सुदृढ हुनुपर्नेमा जोड दिनुभयाे ।